歌手檔案

車頤 CHERIE

  • ETERNITY 主音歌手
  • 多媒體製作人
  • 香港電影『桃姐』第二副導演

好鍾意『秋雨甘霖』呢首歌福音歌,內容講人生有好多無常,有起有跌,但係當喺絕望同患難裡面,但係神嘅愛同信實就好似秋天嘅雨一樣落喺我地嘅生命裡面,令我地嘅人生變得更加豐盛同精彩。

呢首歌可以講係我人生嘅寫照,希望我嘅分享可以令到你對神嘅愛有更多更立體嘅認識。

首先講吓我點樣認識耶穌,我由細到大都係喺基督教嘅學校長大,接觸聖經,成日唱詩歌,聽好多聖經故事係耶穌基督等等,但係以前嘅我真係覺得係故事,無咩大嘅感受,唔係好關自己嘅事,直至中五六左右,見到一班死黨同學有好大嘅改變,介紹吓我讀邊啦,我本身係一間貴族學校度讀書,因為自己家景十分普通,同其他有錢同學格格不入,反而認識咗一班同自已差唔多背景嘅同學仔,但係喺校內就係壞分子,而呢班同學仔中五六嘅時候由金頭髮變返黑頭髮,由蒲冰場變成蒲自修室,由食煙上癮變成背金句上癮,我就覺得好神奇,所以就跟佢地返教會睇吓,究竟係啲咩令到佢地有咁大嘅改變,後嚟喺教會裡面,我信咗耶穌。但係呢個信仰有少少二手,我係因為我啲朋友而返教會,我係因為我啲朋友信所以我信,佢地返團契我又返,人云亦云咁,我自已有同神建立個直接嘅關係,所以要守住嘅個信仰一啲都唔易,而後嚟入咗大學過住大學生嘅多姿多采嘅生活時候,慢慢就因為同咗一個唔信嘅男朋友一齊,就咁離開咗信仰。

我介紹一吓我入咗咩科,我讀咗浸會傳理系電視電影系,入呢一科嘅原因係因為我好鍾意表演,以為佢係同表演差唔多類似嘅嘢,所以入咗去,但係原來係好大分別,個分別就係鏡頭前同鏡頭後嘅分別,我鍾意嘅係企喺鏡頭前,但係我讀嘅就係企喺鏡頭後,入咗去先知大鑊,你可能問咁你點解唔讀演藝嗰啲,我的確係有報亦都收咗我,但係我媽咪大力反對,話讀埋晒啲唔三唔四冇大學學歴嘅嘢,所以就服從阿媽,就入咗傳理系。讀嗰三年都冇咩嘢,因為我通常都企喺鏡頭前面,做啲同學仔師兄師妹嘅演員,都過到,但係畢業之後,要面對社會嘅現實,阿媽又催攞家用,放棄咗幕前嘅夢想,喺一間公營廣播機構嘅電視部裡面做PA。

有冇人知咩係 PA 呀?英文叫 Production Assistant,中文叫助理編導,箇名思義係助理個導演,亦即係咩都係你做,包括排 RUNDOWN,約演員,揾場景,道具服裝,連個演員啲飯盒都關你事,我做咗一年就知道根本就唔係我杯茶!

我鍾意靚靚咁喺幕前,點會鍾意做幕後做呢?所以開始冇耐我就打算唔撈嘞。但係正當我唔想撈啦之際呢,我老豆『 MOTOROLA 』喎!我老豆冇得撈啦,嘩,好大鑊呀,我老豆喺一份高薪厚職比人 Lay 咗,LAYOFF 咗,我成為咗屋企唯一嘅家庭經濟支柱,我妹重讀緊大學,唯有頂硬上囉。

呢段時間維持咗年半,可怕嘅十八個月,頭先都講過我份工好大壓力,就算你好鍾意嗰份工,都會感到好大壓力,樣樣都唔錯得錯咗會比人鬧,你都會覺得好辛苦,但係我嘅情況重要係我唔鍾意份工但係一定要做,慢慢我個人開始好燥,就係咁我開始喺一個負能量嘅人生低下,我好似冇出路咁,嗰時我時常心裡面都會彈一句聖經金句叫離了祢我不能作甚麼,我好想揾到出路。

後嚟發生嘅一件事令到我去到一個爆發點,二零零三年四月一號,一個我一生都忘記唔到嘅日子,嗰日從電影嘅朋友傳嚟一個消息,張國榮死咗!(呢度有冇 LESLIE 嘅 FANS?)起初我冇辦法相信,但係後嚟証實咗係真㗎,我好傷心,因為我係忠實嘅榮迷,我七歲已經唱 Thanks Thanks Thanks Thanks MONICA ,佢亦係我一生嘅榜樣,我覺得好似佢咁就叫做成功,靚仔,有錢有才華有成就勁出名,一切好嘅嘢都喺佢身上,但係點解,咁完美嘅佢都要自殺,咁金錢才華成就都滿足唔到佢,咁人生應該去追求啲咩呀?

一年以嚟呢個問題不停咁圍繞住我,一年後嘅四月一號,我買咗一束好靚嘅白玫瑰,去到文華酒店去紀念佢,仍然帶住好多疑問,好多嘅不捨,我男朋友見我咁傷心就帶我去睇一場戲舒緩吓,但係竟然帶我去睇『受難曲』有冇人睇過受難曲?當時嘅我對呢個故事非常之熟悉,以前睇聖經睇過幾廿次,但係嗰一日出奇地感動,當我見到羅馬軍用九個勾嘅鞭鞭落耶穌度嘅時候,我喊到好緊要,以前我唔明白聖經裡面講耶穌嘅愛,但係嗰刻我明白,齣電影活生生咁情現咗耶穌被判到處決嘅情況。Leslie 嘅死令到我明白人生嘅價值未必喺名同利裡面揾到,而耶穌嘅死令我感到呢份無私嘅大愛,而呢份愛填補咗我心裡面嘅空虛同疑問,令到我嘅人生揾到追尋嘅方向。

自此之後我就開始跟住神一路行,生命變得不再一樣,知道萬大事都有上帝去托住我行,上帝嘅都使用我嘅恩𧶽去事奉佢,講返我份工,我知道因為唔係我杯茶,另外我咪好鍾意幕前嘅演出嘅,我相信上帝比得一個恩賜我我係應該好好發揮佢,所以我喺成為返基督徒之後冇耐,我就辭去咗 PA 呢份工作,開始用音樂去傳福音。當然收入比以前梗係冇得比,但係我開心指數高咗好多,日日都做緊啲我鍾意做嘅嘢喎,重要好多時候會見到好多人舉手信耶穌,你知唔知呀,當你地每一個人信耶穌嘅時候,天上面嘅天使都會開心到開 PARTY,所以記住把握呢個機會。你可能會問吓咁你夠唔夠使㗎,我可以話比你知,夠有餘,因為神喺聖經裡面話『先求祂的國和祂的義,這些東西都會加你們』,當我地去服侍神嘅時候,唔單止係金錢,重有豐盛嘅人生,親密嘅關係都會加比我地。

幕前演出方面,我除咗有機會出灌錄自己嘅福音詩歌之外,重有我有機會主持一啲基督教嘅節目,包括『一車音樂』、『一激音樂』、DBC 裡面都有一個『恩典時刻』嘅節目係我主持,每集都訪問一啲嘉賓講佢地點樣認識神。訪問咗咁多嘅朋友佢地有啲係律師,有啲係經理人,有啲係生意人,佢地好多都話比我知,無論佢地有幾多錢幾多名佢地心裡面仍然好空虛,好似有個洞咁,咩嘢都有辦法填補,唯有認識上帝之後,神嘅愛填滿咗佢地嘅心,令佢地感到豐盛!你都可以㗎喎!記住呀,信耶穌好正㗎!