王君馨產後露面預告表演勁歌熱舞 關心妍爆女兒超鍾意睇 (東網)

藝人王君馨（Grace）、關心妍（Jade）、王祖藍與太太李亞男等，今日（3日）出席藝人之家舉辦的《普世歡騰星光夜》音樂會記者會，產後露面的Grace預告將在音樂會上勁歌熱舞，心情有少許緊張：「今年我第一次帶囡囡紐約探家人，演唱會係12月23號，我22號會轉機早少少返香港，會帶埋囡囡睇演唱會，佢平時6、7點瞓覺，但佢去完紐約預佢有時差，演唱會8點開始，剛好係紐約朝早8點，係佢最精神嘅時間，今次係囡囡第一次睇我演出。」她透露已準備好獻唱歌曲，最近已開始做運動，現時要好好練舞。

提到她之前在社交網發表末日論，她稱因為當時網上盛傳9月是世界末日，她指聖經也有講世界末日，雖然未知何時但大家都要做好心理準備：「例如去解開心結同願諒之前得罪你嘅人，或者去完成想做但未做嘅事，我覺得呢個都係好好嘅提醒。」

至於Jade開心屆時有機會跟前輩杜麗莎和黃國倫同台，又指女兒很喜歡看Grace跳舞，並因此愛上K-POP及學跳舞：「佢迫我同佢一齊跳，但我真係冇跳舞沒天分，不過我想同佢有親子時間，所以只能夠盡力。（會唔會送佢去韓國受訓做女團？）佢又冇諗住做女團，佢想做運動員參加奧運，佢學咗忍者訓練3年，遲啲洛杉磯奧運會，會將忍者障礙賽第一次列入比賽項目，佢好想將來參加，呢個係佢嘅夢想，有夢想好緊要！」

身為音樂會策劃人的王祖藍透露音樂會籌備年多，定於聖誕節期間舉行望為大家帶來節日氣氛，現場還有市集及小食攤檔，李亞男笑言負責飲食部及設計。

提到祖藍最近在內地節目中透露父親於46歲時因直腸癌離世，令他留下陰影，擔心自己活不過46歲，還有2個月已踏入46歲的祖藍表示：「節目播出後，發現原來原來好多男人都有相似經歷，細個爸爸早走，留下心理陰影，希望大家加油衝破陰影。（係咪年年驗身？）我哋全家有少少唔舒服就入醫院檢查，好似之前我個肚有少少痛都去咗照超聲波，結果冇事連瘜肉都冇。」而李亞男指早於兩人拍拖不久，祖藍已告知她有這方面擔心：「當時聽到都嚇親，會諗係咪到嗰個時間就要做定心理準備，總之勤力檢查身體，保持飲食健康。」問到46歲生日當天是否要大事慶祝？祖藍笑言：「都會開開心心食番餐！」